Psalms 115
Yoova, ye Maaron tau
1O Yoova, yei lolomai pa tamtoghon tipait izamai malep.Tipait yom izam pa tapirim ve poia tiom, ghoro poia.
Pasa, lolom ineep tuŋia ila to tamtoghon tiom ve uluul di, ve utaghon saveeŋ mbuaaŋ tiom irau sawa isob.
Tovenen upatooŋ tapirim, ve uul ghei.
2Pa vene, ndug ndug tiveleg ghom, ve tisaav payei tighaze:
“Aa, Maaron tiam ineep sine?”
3Eemoghon yei niwatag: Maaron tiei, ye ineep izi sambam.
Ve sa ŋgar to ye ighaze ighami, nene ighami moghon.
4Ndug ndug tighagharaat maaron todi pa silva ve gol.
Maaron kaaromŋa tonowen, tamtoghon tigharaat di pa nimadi. a
5Yes ledi avodi. Eemoghon tisavsaav maau.
Ve ledi matadi. Eemoghon tighita ndug maau.
6Yes ledi taliŋadi. Eemoghon tilooŋ saveeŋ maau.
Ve ledi uzudi. Eemoghon tiyaaz mbeb eta vuzi maau.
7Yes ledi aghedi. Eemoghon irau tilaagh maau.
Ve ledi nimadi. Eemoghon irau tikis mbeb eta ve tiyamaana ne maau.
Onoon kat, saveeŋ ma taŋiiz eta ivot pa avodi maau. b
8Tamtoghon to tighagharaat maaron kaaromŋa tovene ve tinumeer di, yes tisob tinimale maaron todi tonowen. Tirau mbeb eta maau.
9Yam ival tiina to Israel, anumeer Yoova.
Pasa, ye to Volaaŋa tiam, ve inim sigeu payam.
10Ve yam to watooŋrau to avot ila to Aron ne paam, anumeer Yoova!
Pasa, ye to Volaaŋa tiam, ve inim sigeu payam.
11Tovenen yam to amatughez pa Yoova ve ataghon ŋgar toni, yam asob anumeera.
Pasa, ye to Volaaŋa tiam, ve inim sigeu payam.
12Yoova mata iŋgalŋgal ghei. Ve ye pale ighur poia toni iza tiei.
Pale ighur poia toni iza to yes to watooŋrau to tivot ila to Aron.
Ve ighur poia toni iza to ival tiina to Israel paam.
13Tovenen yes to timatughez pani ve titaghon ŋgar toni, ye pale ighur poia toni iza to yes tisob.
Yes to ledi izadi maau, ve yes to izadi tintina ne paam.
14Yoova pale igham gham toman papaghu tiam amasa anim naol.
15Yoova to ighur sambam ve taan.
Ye pale ighur poia toni iza tiam.
16Sambam, nene Yoova ndug toni.
Ve taan, nene ye igham pa iit tamtoghon pa taneep ila.
17Yes to timaat ve tizila ndug to mateeŋa, eta iyou oroor maau. Neneeŋadi moghon.
Irau tipait Yoova muul maau.
18Eemoghon iit to taneep mataad iyaryaar, ghoro lolood poia pa Yoova, ve tapaiti pa poia toni.
To aazne, ve itaghoni taghoni gha ila.
Aleluia, tapait Yoova!
Copyright information for
TUCO